Jean Claude Ndihokubwayo batazira pêcheur aratabarizwa n'abakimufiseko agatima ngo ntiyicwe canke agirirwe nabi n'abariko baramutoteza bamwagiriza uburozi
Amakuru ava i Buramata, amenyesha ko ukuntu umunyagihugu Jean Claude Ndihokubwayo batazira pêcheur, umurovyi, abayeho muri kino gihe biteye umubabaro n'agahinda. Uwo munyagihugu ngo yabaye nk'igicibwa. Uwo babonye avuganye nawe, ntamenya abamwirutseko bakamutoteza ngo akorana n'umurozi. Asigaye ari nyamwigendako mu gihugu gifise indongozi zivuga ko zikorera abanyagihugu zijejwe.
Mw'ijoro ry'uwa 16 rishira 17 Myandagaro uyu mwaka wa 2025, nkuko amakuru ava i Buramata abandanya abimenyesha, Jean Claude Ndihokubwayo yahatswe kugandagurwa hakoreshejwe imipanga. Umwe mu bahatswe gukora iryo bara azwi ku ritazirano rya Mubizure asanzwe aba ku Muzinda muri komine Mpanda nyene, akaba yari yigavye uwo musi hari hateguwe igandagurwa ry'uyo munyagihugu, Imana irakinga aca aba arasubiye ahaba ku Muzinda.
Aho bigeze rero, Jean Claude Ndihokubwayo, ntacemerewe kurangurira umurimo wiwe umutunze muri Buramata i Gisoro. Abanyagihugu bamutabariza baribaza ahava ububasha bw'umunyagihugu yitora agafatanya na zimwe mu ndongozi bakabuza uwundi munyagihugu gukorera mu gihugu ciwe, ku gatumba avukako bikabasiga.
Uwamwirukanye ngo ntazosubire gukorera aho hantu yitwa Jean Marie wa Ngendera. Ndayizigamye mwene imbuga nawe nyene ntashaka ko abandanya akorera aho ku Gisoro. Uwurongoye segiteri ya Buramata ngo ntaco ashima gushikiriza ku magorwa y'uwo munyagihugu yagirizwa ko ari umurozi, akabuzwa no kubandanya akora akazi kamutunze hamwe n'umuryango wiwe. Mu gihe umukuru w'igihugu adasiba guhamagarira abanyagihugu gukura amaboko mu mpuzu ngo bakore biteze imbere bateze imbere n'igihugu.
Ako gatotezo jean Claude ariko arakorerwa, abanyaburamata bamenyesha ko ari umugambi wateguwe n'umukenyezi Rebecca Mpawenimana yahoze yubakanye na Jean Claude Ndihokubwayo, biciye mu mategeko hagera igihe umubano wabo wanka ubutungane burabatandukanya. Rebecca ngo akaba yaciye yiha umugambi wo gutoteza mu buryo bwose bushoboka uwo bahoze bubakanye, ngo bibaye ngombwa agandagurwe, aca arondera akagwi kabimufashamwo.
Mu ntumbero yo guhuvya amatohoza yokurikira igandagurwa rya Jean Claude Ndihokubwayo, ako kagwi gafatanije na Rebecca yahoze yubakanye na Jean Claude kabanje gusohora urutonde rw'abantu 12 bagirizwa uburozi bategerezwa kugandagurwa, murabo 12 Jean Claude Ndihokubwayo batazira pêcheur akaba arimwo.
Abanyagihugu b'i Buramata batabariza Jean Claude Ndihokubwayo, basaba abajejwe intwaro n'umutekano muri komine Mpanda no mu ntara ya Bujumbura, gufata ingingo zikingira uwo munyagihugu, abariko bagerageza kumugandagura nabo bakurikiranwe n'ubutungane. Twagerageje kurondera musitanteri wa komine Mpanda, Léopold Ndayisaba, kugira tumubaze ko hari amakuru ajanye n'umutekano w'uyo munyagihugu aramenya ariko twamukenye. Tukazobandanya tugikurikirana.
Iyi nkuru yanditswe na Ninette Nancy MUTONI.