Bamwe mu bayoboke b'ishengero rya Pantekoti mu Burundi, bavuga ko batabona ikibuze ngo Pasitori Karenzo Charles na Ngendakumana Claver bafatwe kugira babazwe akajagari baguma bateza mw'ishengero ryabo
Indyane mw' ishengero rya pantekoti zirabandanya. Ni mu gihe bamwe bari bamaze kubona ko icuka kibi cahora muri iryo shengero cacurese. Yamara Abapastori babiri Karenzo Charles na Ngendakumana Claver baherutse gukoranya umugwi w'abapasitori bari kumwe muri G10 bapfundika ingingo yo gukombora ubutarariye inzego nshasha zaheruka gushirwaho n'imigwi ibiri ihanganye mw'ishengero rya pantekoti igizwe na G10 na G5. Mugushiraho izo nzego, iyo migwi ikaba yari yafashijwe n'ubushikiranganji bw'intwaro yo hagati mu gihugu.
Muri izo ndyane, ejo hahise igenekerezo rya 27 Nyakanga 2025, iminsi 8 yari yahawe abarongozi bashasha ba CEPBU ngo babe bakuye meza niho yari yuzuye. Intumwa zirongowe na Karenzo Charles zaciye zizindukira ku cicaro c'iryo shirahamwe ry'amashengero ya Pantekoti mu Burundi bahashikanywe no gushira mu ngiro icipfuzo cabo co kwirukana inzego nshasha za CEPBU. Igipolisi naco carahishikiye ariko uruganda rwa Radio Haguruka rukaba rutaramenya igituma.
Bamwe n'abandi bakurikirana ibiriko bibera mw'ishengero rya pantekoti mu Burundi bamenyesha ko abapasitori Charles Karenzo na Claver Ngendakumana bari mu bwoko bw'abahutu, babandanya guca hirya no hino mu bategetsi bamwe bamwe bo muri CNDD-FDD basigura ko ibibazo ishengero rya Pantekoti mu Burundi rifise bishingiye ku bwoko. Ngo bavuga ko abo mu bwoko bw'abatutsi basangiye ishengero barondera gucinyiza abapasitori bo mu bwoko bw'abahutu. Iyo mvugo ngo ikaba isanzwe itahurwa cane na CNDD-FDD ata gutohoza ngo hamenyekane ukuri. Biruko mu gihe ic'ubwoko ata hantu na hamwe gihuriye n'ibibazo biri mw'ishengero rya pantekoti. Ibibazo bihari ngo biriko bituruka ku butunzi bw’ishirahamwe ry’amashengero ya Pantekoti barondera kugabangana bidaciye mu mategeko.
Bamwe rero mu bayoboke b'ishengero rya Pantekoti mu Burundi, muri kino gihe babona ko Ishengero ryabo rishobora gucikamwo kabiri. Ngo hari n'abibaza ko Umukuru w’igihugu yoba agira yisubireko nkuko akunze kubikora mu bintu bitandukanye, akegurira ubutunzi bw'iryo shirahamwe ry'amashengero ya Pantekoti umurwi wa G10 kuko yari yaserukiwe mugutora umuti w'ingorane zivugwa muri pantekoti ariko uruhande rumwe rukaba ruriko rufata ingingo rudafitiye ububasha. Ico ngo nticoshoboka ata nguvu bahawe n'umukuru w'igihugu abicishije ku batoni biwe. Muri pantekoti ntibabona ikibuze ngo Pasitori Karenzo Charles na Ngendakumana Claver bafatwe babazwe akajagari baguma bateza mw'ishengero ryabo.
Bamwe n'abandi bavuga ko badatangajwe n'iyo nyifato yabo bapastori Charles na Claver mu gihe reta yari yafashije kugira umuti uboneke. Iyo nyifato ngo ibandanije kuko abo bapasitori bari mu mugwi G10 bashigikiwe na bamwe mu bihangange vyo mu mugambwe CNDD-FDD uri ku butegetsi biriko bikora ibishoboka vyose ngo ishengero rya pantekoti mu Burundi rishigwe mu minwe y'abanywanyi b'umugambwe CNDD-FDD. Amanyanga nkayo bavuga ko amenyerewe ku butegetsi bwa CNDD-FDD aho bwanashoboye kwishiraho mu 2025 nk' ubukomoka mu mugambwe umwe, bushaka n'amashengero mu Burundi abe ayayoboka CNDD-FDD. Inyifato nk'iyo yo guhadikiriza ibintu vyose mu mugambwe CNDD-FDD bakabona ko abarundi badakwiye kubandanya bayihanganira, ngo bakwiye guhaguruka bakayirwanya.
Vyanditswe na Don de Dieu MBAZUMUTIMA.