Naho vyabaye akamizwe ningoma ntibivurwe, muri Comine Bugendana zone Bitare, umutumba Gaterama, Intara ya Gitega, hari abanyagihugu batatu (3) bagandaguwe n’aba polisi mu gatondo ko kuri uwu wa kabiri
Intandaro y’urupfu rwabo, Sentare nkuru yari iramutse iza gusatura itongo, ariko bikavurwa ko iryo tongo ngo ryari risatuwe mu buryo bwo kunyaga bamwe mu berwa n’amatati yiryo tongo. Muguharanira uburenganzira bwano kubwiryo tongo ryabo bagira banyarwe, ngo abo bagira banyarwe, ngo bahisemwo kwihereza ibarabara riva i Bugendana rija kw’ibubu mu Kibimba, batako baranarizibira n’amabuye kuburyo atamodoka canke imoto yashobora kurengana.
Bitumwe n’ubwinshi bwabanyagihugu bahavuye bashwabaduka bakaza kuraba ibiriko biraba, abapolisi nabonyene bahavuye baza batazambaye, nayo abanyagihugu ngo baca batangura gutera amabuye abo ba Polisi, nabo baca bagandaguramwo abanyagihugu batatu, baca bagirako bitaba Imana ubwo nyene, abo bapolisi bakaba babanje gutera icumu umwe ariko riramihusha, baca babamijagiramwo amasase, batatu muri abo banyagihugu bari bazibiye ibarabara riva i Bugendana rija kw’ibubu mu Kibimba, babona kw’itaba Imana.
Ido n’ido ryiyi nkuru, harimwo imyidondoro y’abanyagihugu bitavye Imana, turacariko turabirondera, ikaba ari inkuru tuzogarukako hanyuma. Ariko tubibutseko, ubwicanyi bubera muriyo Komine ya Bugendana bunda kunyegezwa ntibumenyekane, akarorero naka Longin Nahimana, yahoze arongoye umutumba wa Carire, kuva mu 2010 gushika mu 2025, yaragandaguwe bunyamaswa mw'ijoro ryo ku wa 07 ushira uwa 08 Myandagaro 2026 yamara bikaba akamizwe n’ingoma.
Nk'uko amakuru ava ahabereye iryo bara uruganda rwa Radio Haguruka twashoboye kumenya,abishikiriza, Longin Nahimana yari atashe ku muhana iwe mu masaha y'imbere y'isaha zine z'ijoro aho yahura n'abagizi ba nabi bamutema umupanga kw'izosi hanyuma babona kumukerera n'imbugita, gushika yaho umutwe bawutandukanije n’ibindi bihimba mbere bakagirako n’amagara yiwe n’ukuvuga igihimba c’irondoka bakagitandukanya n’ibindi bihimba. Uwo yahoze arongoye umutumba wa Carire akaba yatowe mu gitondo co ku wa 08 Myandagaro 2026 yamaze kwitaba Imana.
Ico gihe, abajejwe intwaro n'umutekano bakaba barashitse ahabereye iryo bara, maze baca bafata ingingo yo kujana ikiziga c'uwo yari yagandaguwe mu buruhukiro bw'ibitaro bikuru vyo mu Kibimba. Naho bavuze ko amatohoza ngo yari yatanguye gukorwa ngo kugira hamenyekane abamwishe n'icatumye bakora iryo shano, gushika nubu ntiharigera hashirwa ahabona ico ayo matohoza yashitseko.
Inkuru yanditswe na Don de Dieu MBAZUMUTIMA.